நினைவிலும் பிரிவிலும்

தென்றல்
என்னை வருடுவதில்
மலர்கள்
என் பெயர் உச்சரிப்பதில்
பௌர்ணமி
என் மேற் கவிழ்வதில்
கனவுகள்
என்னைத் தாலாட்டுவதில்
மேகம்
என்னைச் சுமந்து செல்வதில்
இவற்றின் போதெல்லாம்
என் புலன்கள் உணராத
இனிய சுகம்
உன் நினைவுகளின் போது மட்டும்
எப்படி நிகழ்கிறது!

வெள்ளம்
என்னை அடித்துச் செல்வதில்
புயல்
என்னைச் சுழற்றி எறிவதில்
சுனாமி
என் கழுத்தை நெரிப்பதில்
பூகம்பம்
என்னைப் பிளந்து விழுங்குவதில்
நெருப்பு
என் உடலைப் பொசுக்குவதில்
இவற்றின் போதெல்லாம்
என் புலன்கள் உணராத
கொடிய அச்சம்
உன் பிரிவின் போது மட்டும்
எப்படி நிகழ்கிறது!

என் உணர்வுகளைத் தாலாட்டும்
மற்றொரு தாய்
நீ என்பதாலா?

October 2006